Salyan rayonunun aşağı Kürkənd tam orta məktəbində I Qarabağ müharibəsi şəhidi Fikrət Əliağa oğlu Mustafayevin anadan olmasının 50 illiyi münasibətilə keçirilən tədbirdə məktəbin pedaqoji kollektivi, şagirdlər, şəhidin doğmaları, yaxınları, rayon ictimaiyyətinin nümayəndələri iştirak etmişlər. Oncə Dövlət Himni səslənmiş, şəhidlərin ruhu bir dəqiqəlik sükutla yad edilmişdir. Qeyd edək ki, Fikrət Əliağa oğlu Mustafayev 1975-ci il fevralın 7-də Salyan rayonunun Aşağı Kürkənd kəndində dünyaya göz açmışdır. 1993-cü ildə anadan olduğu kənd orta məktəbi bitirdikdən sonra, elə həmin il ordu sıralarında həqiqi hərbi xidmətə çağırılmışdır.“Böyük Ermənistan” xülyasını gerçəkləşdirmək istiqamətində ölkəmizə qarşı ədalətsiz müharibəyə başlayan nankor qonşularımızın işğalçılıq niyyətinin qarşısını almaq, mənfur düşmənə öz yerini göstərmək üçün ölüm-dirim savaşına qatılan vətənpərvər oğullar sırasında cəsur həmyerlimiz Fikrət Mustafayev var idi. İgidliyi, şücaəti dillər əzbəri olan, buna görə də “Rembo” ləqəbi verilən Fikrət döyüşçü yoldaşlarının sevimlisinə çevrilmişdi. Yalnız qələbə əzmi ilə döyüşdən-döyüşə atılan qəhrəman eloğlumuz Füzuli rayonunun Qaraxanbəyli kəndi uğrunda gedən döyüşlərdə ölümsüzlük zirvəsini fəth edərək şəhidlik mərtəbəsinə yüksəlmişdir..Dövlətimiz tərəfindən Fikrət Mustafayevin adı əbədiləşdirilmişdir. Vaxtilə təhsil aldığı Aşağı Kürkənd tam orta məktəbi, kəndin küçələrindən biri və Salyan Rayon Uşaq Gənclər İdman Şahmat Məktəbi onun adını dəyişir.
Tədbirdə çıxış edənlər Fikrət Mustafayevin qəhrəmanlığından söz açmış, 44 günlük Vətən müharibəsində qazanılan tarixi zəfərlə, digər şəhidlərimiz kimi, onun da qisasının alındığını vurğulamış, əziz xatirəsinin hər bir soydaşımızın qəlbində əbədi yaşayacağını bildirmişlər.
Məktəbin şagirdləri vətənpərvərlik mövzusunda bədii kompozisiya nümayiş etdirmişdir
