Salyan Rayon Mərkəzi Xəstəxanasında insanların hörmətini qazanan həkimlərimiz onlarladır. Hər dəfə yolumuz bu şəfa ocağına düşəndə “nə yaxşı ki, belə həkimlərimiz var” -deyə düşünürəm. Son zamanlar səhiyyə müəssisələrinə müraciət edənlərin sayı artıb. Bu ölkəmizdə icbari sığortanın əhatə dairəsinin genişlənməsi, xəstələrin müayinə və müalicəsi üçün şəraitın yaxşılaşması və bir də həkimlərimizin peşə bacarığının yüksəlməsi , xəstələrə diqqət və qayğının artmasıdır. İllərlə tanıdığım həkimlər sırasında bu gün həkim-fizioterapevt Təranə Axundova haqqında söz açmaq istəyirəm. Çoxları kimi mən də fiziki sağlamlığımla bağlı müalicəmi məhz ona etibar edirəm. Bu qayğıkeş həkim hər gün onlarla xəstəyə fizioterapiyanın müxtəlif üsullarında müalicə təyin edir. Rəhbərlik etdiyi kiçik kollektiv təyin olunan müalicələri yüksək peşəkarlıqla icra edirlər. Müalicə üsulları isə şəfavericidir. Çox illik müalicə təcrübəsindən bilirəm ki, elektroterapiya əzələ funksiyalarının bərpası, ultrasəs terapiyası iltihabın azaldılması, qan dövranının yaxşılaşdırılması, maqniterapiya isə sümük və oynaqların bərpası zamanı tədbiq edilir. Hər kəsdə xəstəliyin diaqnozuna uyğun digər müalicələr də tədbiq edilə bilər.
Bir neçə gün əvvəl Təranə xanımın həkimlik fəaliyyəti ilə daha yaxından tanış olmaq istədim. Əslində bəzi məqamları ictimaiyyət nümayəndəsi kimi bilirdim. Mənə də məlum idi ki, 44 günlük Zəfər döyüşlərində yaralanaraq rayon xəstəxanasında qısa müddətli müalicə alan qazilərimizin reabilitasiyasına lazımı dəstək göstərmişdir. İşlərin uğurlu icrasında ona tibbbacısı Amaliya Rəhimova yaxından köməklik göstərir.
T. Axundova söyləyir ki, zərurət olanda şəhid valideynlərinin və bu ailələrin digər üzvlərinin, qazilərimizin yaşadıqları ünvanlarda müayinə və müalicəni təşkil etməyi özümüzə borc bilirik. Müsahibimizlə söhbət zamanı öyrənirik o şəhər 7 saylı tam orta məktəbdə təhsil alıb.1993-cü ildə yüksək balla Tibb universitetinin müalicə-profilaktika fakültəsinə daxil olmuş, 2000-ci ilə ali təhsilini başa vuraraq Salyan Rayon Mərkəzi xəstəxanasında həkim-fizioterapevt kimi fəaliyyətə başlamışdır.
Bu il Təranə Axundovanın həkimlik fəaliyyətinin 25 ili tamam olur. Az müddət deyil. Bu illərdə o dəfələrlə müxtəlif peşə konfranslarında olmuş, yenilikləri mənimsəyərək işində tədbiq etmişdir. Üç dəfə həkimlərin sertifikasıya imtahanından keçmişdir. Həmişə işinin başındadır. Hər gün neçə- neçə xəstəni qəbul edir, müalicə təyin etməklə yanaşı fizioterapiya kabinetlərində müalicəyə fərdi qaydada nəzarət edir.Uğurlar arzu edirik.
Rüstəm Məlikov, anakur.az saytının təsisçisi və baş redaktoru,
prezident təqaüdçüsu
