Salyan Rayon Mərkəzləşdirilmiş Kitabxana Sisteminin mərkəzi kitabxanasında veteran həkim Afət Ələkbərovun anadan olmasının 85 illiyi münasibətilə ədəbi bədii tədbir keçirilmişdir.keçirilən tədbirdə səhiyyə işçiləri, ictimaiyyətin nümayəndələri, yubilyarın ailə üzvləri iştirak etmişlər. Qeyd edək ki, Afət həkim 10 noyabr 1937 –ci ildə Salyan rayonunun Marışlı kəndində dünyaya göz açmışdır. Salyan şəhər 2 saylı tam orta məktəbi bitirdikdən sonra təhsilini rayon tibb texnikumunda davam etdirmişdir. Texnikumda təhsilini başa vurduqdan sonra anadan olduğu kənddə traxoma –feldşer məntəqəsinin müdiri kimi əmək fəaliyyətinə başlamışdır. 1962 –ci ildə N. Nərimanov adına Azərbaycan Dövlət Tibb İnstitutunun müalicə -profilaktika fakültəsinə qəbul olunan gənc 1968 –ci ildə bu ali məktəbi bitirmişdir. Salyan Rayon Mərkəzi Xəstəxanasında həkim –terapevt kimi işləyən gənc həkim Salyan Tibb Məktəbində tədris üzrə direktor müavini vəzifəsinə dəvət olunmuş, tibbi kadrların hazırlanmasında səmərəli fəaliyyət göstərmişdir. Afət həkim şəhər poliklinikasının müdiri, mərkəzi xəstəxanada terapiya şöbəsinin müdiri, rayonlararası həkim -əmək ekspert komissiyasının sədri kimi məsul vəzifələrdə çalışmışdır. Təşəbbüskarlığı, səhiyyə sahəsindəki xidmətləri nəzərə alınaraq həm SSRİ dövründə, həm də ondan sonrakı müstəqillik zamanında Afət Ələkbərovun əməyi layiqincə dəyərləndirilmiş, 1987 –ci ildə o, SSRİ səhiyyə, 90 –cı ildə isə sosial təminat əlaçısı adına layiq görülmüş, fəxri fərman və diplomlarla təltif olunmuşdur. Eyni zamanda ictimai –siyasi fəallığı ilə diqqəti çəkən Afət həkim 1994 –cü ildən 2004 –cü ilə kimi YAP rayon təşkilatı idarə heyətinin üzvü, partiyanın I, II, III qurultaylarının iştirakçısı olmuş, rayon sovetinin deputatı, ilk bələdiyyənin üzvü seçilmişdir.
Afət həkim həyat yoldaşı Bəsti xanımla birlikdə 4 oğul, bir qız böyüdüb tərbiyə etmişdir. Çoxlu nəvə -nəticələri vardır.
Afət həkim həm də fəal ictimayyətçidir.Rayon ağsaqqallar şurası sədrinin müavini kimi bu gün də bir ağsaqql kimi ictimai fəaliyyətini davam etdirir.
Tədbirdə çıxış edənlər rayon MKS –nin direktoru Səidə Əliyeva, rayon ağsaqqallar şurasının sədri Beydulla İmanov, rayon ziyalılar birliyinin sədri Allahverdi Piriyev, tarixçi –tədqiqatçı Sahib Həsənov, Biləsuvar Regional Mədəniyyət İdarəsinin Salyan rayonu üzrə nümayəndəsi Şamxal Əhmədov, rayon mədəniyyət mərkəzinin bədii rəhbəri Kürçaylı Məmmədov, həkimlər Əlisəftər Axundov, Sabir Kərimov, şəhid Samir Mehdiyevin atası Valeh kişi Afət Ələkbərovu doğum günü münasibətilə təbrik etmiş, onu dəyərli həkim, gözəl ziyalı, xeyirxah, qayğıkeş insan kimi səciyyələndirmişlər.
Şairlər Zabil Pərviz, Əzizağa Məmmədli, mərkəzi kitabxananın nəzdində fəaliyyət göstərən Xəlil Rza Ulutürk adına poeziya dərnəyinin sədri Həsən Kür, dərnəyin üzvləri Ümid Sadə, Etibar Qoca, Rafiq Feyzullayev, Ramil Əkbərov, Ramil Məmmədov şeirlərini söyləmişlər. Bədii qiraət ustaları Azərbaycan poeziyasından nümunələr səsləndirmişlər. Müğənnilər Aqil Cəbiyevin, Balaş Zamanovun, Rəşad Aydınoğlunun ifaları tədbiri daha da rövnəqləndirmişdir.
Qeyd edək ki, Afət həkim , fəal ictiamyətçi olmaqla həm də maraqlı poeziya həvəskarıdır.Azərbaycanın klassik və müasir şairlərinin yaradıcılığının ən gözəl nümunələrini əzbər bilir.Yaxından tanıyanlar deyir ki, Afət həkim saatlarla əzbər şer söyləməyi bacarır.Onun ifasında şerlər dinləmək insana zövq verməklə yanaşı, həkimin fitri yaddaşına heyranlıq yaşadır. Ən çox müraciət etdiyi şarlərin sırasında isə həmyerlisi Əliağa Kürçaylı poeziyasıdır.
Yubilyar tədbir boyu Azərbaycanın görkəmli şairlərinin poeziyasından nümunələr səsləndirmişdir.
Afət Ələkbərova Səhiyyə İşçiləri Həmkarlar İttifaqı Salyan Rayon Komitəsinin və rayon ziyalılar birliyinin fəxri fərmanları təqdim olunmuşdur.
Yubilyarın oğlu Yusif Ələkbərov atasının doğum gününü yüksək səviyyədə həyata keçirən tədbirin təşkilatçılarına və iştirakçılarına dərin minnətdarlığını bildirmişdir.
Biz redaksiya olaraq həkimə oxucularımız adından can sağlığı arzulayır və yenidən uzunömürlülüyin sirri mövzusunda müsahibə almaq arzusu ilə ayrılırıq.
Anakir.az saytı
